Vor 10 Joor hän sich e paar zämme do
E Gripli isch entstande no dis no,
Leiterwägeli het me gsuecht und gfunde
Bim bastle druff gange sin vieli Stunde.

Laarve het me sini aigeni gno
Und s’Goschdyym au das verstoht sich sowieso,
Räpli ,Carambar und Schläck-Stängel
Siesses fyr liebi und Räpli fyr frächi Bängel.

So het me alles bi nenander kaa
gfraid het me sich Frau wie Maa,
um so mehr grfaid hän sich die Junge
und sin diräggt ins Goschdyym gsprunge.

Eso isch s’Zistigziegli entstande
glai aber oho wohl verstande,
mit Elan hän mirs welle wooge
und sin zämme in de Gasse ume zooge.

Noch e paar Joor, so ca. vier
Hets Wänd an Waage gä us luter zier,
mir häns wie die Grosse welle mache
druff gmolt hän mir lustigi Sache.

Am Afang sins zwei Familie gse
Joor um Joor zu uns gstosse sin als wie me,
die maischte vo de Alte Basler Dante
oder sigs vom aint oder ander e Verwante.

D Kinder-Fasnacht bringt e grossi fraid
Do vergisst e jede si Kummer und Laid,
dr Zistig zeigt is scheeni Sache
und Kinder kenne sälber mit mache!

D Troittoirstampfer wän eich saage
gniesset d Fasnacht mit behage,
kuum isch sie do, isch sie wieder wyt
unseri gliebti Fasnacht Zyt.